Haaqa səlahiyyətliləri, Niderland hökumətinin immiqrasiya siyasətinə qarşı etirazları dağıtmaq üçün polisə gözyaşardıcı qazdan istifadə etmək icazəsi verən fövqəladə sərəncamın tətbiq edildiyini açıqlayıb.
Ucnoqta.az xəbər verir ki, bu barədə hökumətin X səhifəsində deyilir.
Bildirilir ki, təhlükəsizlik məqsədilə Haaqa meri polisə iğtişaşları dağıtmaq üçün gözyaşardıcı qazdan istifadə etmək icazəsi verən fövqəladə sərəncam verib.
Polisin məlumatına görə, bir qrup ifrat sağçı fəal Niderland hökumətinin immiqrasiya siyasətinə etiraz olaraq A12 avtomobil yolunu icazəsiz şəkildə bağlayıb.
Hüquq-mühafizə orqanlarının əməkdaşlarına daş və şüşələrin atıldığı magistral yola təxminən 1500 nəfər toplaşıb, polis maşını yandırılıb. Polis izdihamı dağıtmaq üçün gözyaşardıcı qaz, su şırnaqları və çevik qüvvələrdən istifadə edir.
Buna baxmayaraq, ən aqressiv nümayişçilərdən bəziləri şəhərin mərkəzinə doğru yönəlib. Orada yerli hakimiyyət orqanlarının məlumatına görə, Avropayönlü “Demokratlar 66” hərəkatının ofisinin pəncərələri sındırılıb.