ABŞ prezidenti Donald Trampın administrasiyası xarici yardımı daha 5 milyard dollar azaltmaq niyyətindədir.
Ucnoqta.az xəbər verir ki, bu barədə New York Post (NY Post) məlumat yayıb.
Məlumata görə, ABŞ büdcəsinə qaytarılacaq 5 milyard dolların 3,2 milyard dolları ABŞ Beynəlxalq İnkişaf Agentliyinə (USAID), qalan vəsait isə Dövlət Departamentinin digər fondlarına yönəldilib.
Nəşrin məlumatına görə, yardıma Hondurasda iqlim dəyişikliyi ilə mübarizəyə 24,6 milyon dollar, keçmiş Yuqoslaviya ölkələrində LGBT ideologiyasının təbliğinə 3,9 milyon dollar, resurslarında irq zəminində nifrət doğuran məqalələr dərc etdirən Cənubi Afrika Demokratiya Fondunun işinə 2,7 milyon dollar daxildir.
Bundan əlavə, Ağ Ev Birləşmiş Ştatların büdcəsinə Konqo Demokratik Respublikası və Mərkəzi Afrika Respublikasında BMT-nin sülhməramlı missiyalarının dəstəklənməsinə yönəlmiş 838 milyon dolları qaytaracaq. Kəsilmiş sülhməramlı vəsaitlərə Uruqvaydan sülhməramlılar üçün zirehli transportyorların alınması üçün 11 milyon dollar, Zambiyada təlim mərkəzinin yaradılması üçün 4 milyon dollar və Qazaxıstandan sülhməramlıların yerləşdirilməsi üçün kazarmalar üçün 3 milyon dollar daxildir.