Almaniyanın xarici işlər naziri Yohann Vadeful Avropa İttifaqında (AB) islahatlar üçün altı bəndlik plan təqdim etdi və orada AB-ni, xüsusən də xarici siyasət və təhlükəsizlik sahələrində daha effektiv etmək üçün genişmiqyaslı islahatlara çağırır.
Ucnoqta.az xəbər verir ki, Vadeful Konrad Adenauer Fondu tərəfindən təşkil edilən tədbirdə çıxış edərkən bildirib.
"Altı çox konkret məqamı vurğulamaq istərdim. Birincisi, Brüsseldə "intensivləşdirilmiş əməkdaşlıq" mexanizmindən daha tez-tez istifadə etmək istəyirik. Bu o deməkdir ki, 27 üzv dövlətin hamısının birgə irəliləyişinin yaxın gələcəkdə əldə edilə bilməyəcəyi siyasət sahələrində kiçik bir qrup ölkələr kimi irəliləyəcəyik", - deyə nazir qeyd edib.
Beləliklə, o, ayrı-ayrı ölkələr tərəfindən uzunmüddətli bloklanmaların qarşısını almaq üçün xarici siyasət məsələlərində yekdillik prinsipini ixtisaslı səsvermə ilə əvəz etməyə çağırdı. Vadefulun altı islahat təklifi həmçinin yeni üzvlərin mərhələli şəkildə qəbul edilməsi yolu ilə AB-nin genişlənməsini sürətləndirməyi də əhatə edir. Almaniya kansleri Fridrix Merz artıq bu təşəbbüsün lehinə çıxış edib.