Ümumdünya Səhiyyə Təşkilatının məlumatlarına görə, hər il təxminən 10 milyon insan xərçəngdən ölür. "Ağciyər xərçəngi tale deyil. Ən vacib profilaktika üsulu siqareti tərgitməkdir".
Ucnoqta.az Türkiyə mətbuatına istinadən xəbər verir ki, professor Dr. Atilla Eroğlu 50 yaşdan yuxarı siqaret çəkənlərin hər il müntəzəm olaraq aşağı dozalı kompüter tomoqrafiyası ilə müayinədən keçməli olduqlarını bildirir.
"Erkən diaqnoz həyatları xilas edir. Bu müayinələr erkən mərhələdə ağciyər xərçənginin aşkarlanması və müalicəsi şansını əhəmiyyətli dərəcədə artırır".
Eroğlu bildirib ki, gündə bir qutu və ya daha çox siqaret çəkən 50 yaşdan yuxarı insanlar ildə bir dəfə aşağı dozalı KT müayinəsindən keçməlidirlər.
“Biz xərçəngin özündən deyil, gec diaqnozdan qorxuruq.
Əgər kiçik düyünlər erkən mərhələlərdə aşkar edilərsə, xəstəlik tamamilə müalicə olunur. Buna görə də, 50 yaşdan sonra müntəzəm müayinələr çox vacibdir.” Eroğlu həmçinin nəfəs darlığı, öskürək və sinə ağrısı kimi simptomlara yüngül yanaşmamaq lazım olduğunu xatırladıb və bu simptomları yaşayanlara gecikmədən pulmonoloqa müraciət etmələrini tövsiyə edib.
Keçmişdə ağciyər xərçənginin kişilərdə qadınlara nisbətən 20 dəfə daha çox rast gəlindiyini xatırladan Eroğlu deyib: “Bu gün bu fərq 5 dəfəyə qədər azalıb. Artıq qadınlar və gənc qızlar kişilər qədər çox siqaret çəkirlər. Yaxın gələcəkdə qadınlarda ağciyər xərçəngi riski kişilərə bənzər sürətlə artacaq.” Passiv siqaret çəkməyin də ciddi risk faktoru olduğunu qeyd edən Eroğlu deyib: “Valideynləri siqaret çəkən uşaqlarda ağciyər xərçəngi riski xeyli artır. Buna görə də ictimaiyyətin məlumatlılığının artırılması çox vacibdir.”