Fəzail Ağamali: «Parlament seçkiləri ciddi və məsuliyyətli bir proses olduğu üçün tələskənliyə yol vermək olmaz»

«Qara siyahilari» tutanlarin özləri qara adamlardir»

«Doğrudan da, mətbuata açıqlamamda bildirmişdim ki, avqust ayının əvvəllərinə kimi partiyamızın seçkilərə qatılacaq namizədləri ilə bağlı işlər yekunlaşdırılacaq və Ali Məclisin növbəti iclasında bu yöndə yekun qərar qəbul olunacaq. Ancaq sonradan bu məsələ ilə bağlı partiyamızın Mərkəzi Şurasının yığıncağı keçirildi və ümumi müzakirələrdən sonra belə qərara gəldik ki, Ali Məclisin yığıncağını sentyabr ayının əvvəllərinə təyin edək. Yəni, seçkilərə rəsmən start verilməzdən bir neçə gün əvvələ». Bu fikirləri Ana Vətən Partiyasının sədri, millət vəkili Fəzail Ağamalı səslindirib. Onune sözlərinə görə, bu istiqamətdə artıq müəyyən nəticələr, dəqiqləşmələr var.

- Amma bununla belə, biz ona qədər ölkə daxilində seçki prosesi ilə bağlı bütün faktorları bir daha gözdən keçirməyi, təhlil etməyi daha məqsədəmüvafiq saydıq və sayırıq.

- Partiyanızın Ali Məclisinin iclasının sentyabra təxirə salınması müttəfiqiniz olan hakim Yeni Azərbaycan Partiyasının (YAP) öz namizədlər siyahısını hələ açıqlamaması ilə bağlı deyil ki?

- Bəli, bununla birbaşa bağlıdır. Çünki YAP ölkədə qarşıdan gələn parlament seçkilərində ən ciddi uğur qazanmaq şansı olan partiyadır və bizim üçün həmin partiyanın son qərarı çox ciddi əhəmiyyət daşıyır. Bu, etiraf edilməlidir. Eyni zamanda digər məqamlar da var. Parlament seçkiləri kifayət qədər ciddi və məsuliyyətli bir proses olduğuna görə, düşünürəm ki,  burada tələskənliyə yol vermək olmaz. Ona görə biz belə qərara gəldik ki, bütün məqamlar, detallar, cəhətlər nəzərə alınmaqla son qərarımızı məhz bugünlərdə keçiriləcək Ali Məclisin yığıncağında verək. Artıq bu zaman siyahı da dəqiqləşəcək, konkret taktikamız da müəyyənləşəcək, ortalığa çıxa biləcək bu və ya digər variantlar da müzakirə predmetinə çevriləcək, yekun olaraq partiyanın müvəffəqiyyətini təmin edə biləcək variantlara da üstünlük veriləcək, beləliklə, seçkilərə də qoşulmuş olacağıq.

- İndiyə qədərki praktikadan çıxış etsək, qeyd edə bilərik ki, YAP cəmi iki dairədən – sizin və müavininiz Zahid Orucun qatıldığı seçki dairələrindən öz namizədlərini irəli sürməyib, sizlərə dəstək verib. Bu baxımdan, bu dəfə də belə olacaq, yoxsa YAP-ın AVP il bağlı güzəştə gedəcəyi dairələrin sayı artacaq, yaxud əksinə, azalacaq?

- Bu haqda konkret fikir söyləmək mənim üçün hələ tezdir. Sadəcə, biz AVP olaraq daha çox saylı namizədlərlə seçki prosesinə qoşulsaq da, əlbəttə, onların içərisində seçilmək şansı daha üstün olan namizədlərə önəm vermişik və imkanlarımızı, qüvvəmizi bu istiqamətə səfərbərliyə almışıq ki, daha ciddi şansı olan namizədlərə üstünlük verilsin, onlar seçilsinlər. YAP-la da müzakirələrdə biz bu məsələni xüsusi olaraq vurğulamışıq və onun ətrafında diskussiyalar aparmışıq. İndi qarşıdan gələn parlament seçkiləri ilə bağlı bununla əlaqədar ilkin danışıqlarımız, müzakirələrimiz olsa da, lakin son, yekun müzakirələrimiz olmayıb və yəqin ki, biz öz namizədlərimizi dəqiq müəyyənləşdirəndən, eyni zamanda, YAP-la müzakirələri yekunlaşdırdıqdan sonra neçə nəfər namizədimizin iştirakından tutmuş ta ki şanslı namizədlərimizin seçilmə ehtimalı üzərində də fikir söyləmək mümkün olacaq. Amma indiki halda sizin sualınıza konkret cavab vermək, əlbəttə, çətindir.

- Əgər YAP-la razılaşdırmalar olmasa, AVP YAP-dan kənar iqtidaryönlü partiyalarla seçki bloku yaratmaq istiqamətində danışıqlara başlaya və nəhayət blok yarada bilərmi?

- YAP-la müzakirələrimiz davam edəcək, bu, şəksizdir. Bu məsələ ətrafında mübahisə açmaq istəmirəm və düşünürəm ki, buna ehtiyac da yoxdur. Seçki prosesi, ümumiyyətlə, siyasət belədir ki, hər an, hər zaman yaranmış olan situasiya yeni variantlar, yeni imkanlar ortalığa qoyur və bu imkanlar, bu variantlar əgər partiyaya divident gətirirsə, onun prosesdə iştirakında fəal rol oynayıb, konkret müsbət nəticələr verə bilirsə, bütövlükdə bu prosesə - seçki prosesinin demokratikləşməsinə töhfə verirsə, əlbəttə, onlar üzərində düşünmək və konkret qərar qəbul etmək də mümkündür. İndiki halda isə bu və ya digər blok haqqında hər hansı bir fikir söylmək mümkün deyil. Çünki belə bir ideya, belə bir fikir hələlik ortada yoxdur. Ola bilsin, bu ideya bir neçə gündən sonra aktual olsun, ola bilsin, heç aktual olmasın. Əgər aktual olarsa, biz bunu müzakirə edəcəyik və təbii ki, bununla bağlı fikirlərimizi konkretləşdirib ictimaiyyətə çatdıracağıq.

- Məsəl var, şər deməsən, xeyir gəlməz. Əgər növbəti dəfə seçkilərdə uğur qazana bilməsəniz, partiya sədrliyindən və yaxud, ümumiyyətlə, siyasətdən gedə bilərsinizmi? Onu da qeyd edək ki, müavininiz Zahid Orucdan fərqli olaraq, sizin adınız növbəti dəfə parlamentə düşməyəcək siyasətçilər, millət vəkilləri sırasında çəkilir, adınız “qara siyahılara” salınır və sair...

- Əvvəla, bu “qara siyahıları” tutanların özləri qara adamlardır. İkincisi, “qara siyahıdır”, “boz siyahıdır”, “qırmızı siyahıdır”, mən  bunların heç birinə inanmıram. Düşünürəm ki, bunlar ayrı-ayrı mətbu orqanlarının xəstə təxəyyülünün məhsuludur və onlar mövzu tapmadıqlarına görə bu cür “siyahılar” tərtib edirlər, onları ictimai rəyə sırımağa çalışırlar. Bütün bunların hamısı mənasız və boş şeylərdir. Yaddan çıxarmasınlar ki, parlament seçkilərində iştirakın iki tərəfi var: bir seçilmək istəyən, bir də seçən. Məsələni həll edən bunlardır və eyni zamanda digər kompanentlər də var ki, əlbəttə, bunlar da seçki prosesində özünün əhəmiyyətli rolunu oynayır. Üçüncüsü, mən heç zaman işimi şər üzərində qurmuram. Mən düşünürəm ki, siyasətçi optimist, nikbin, inamlı olmalı, siyasi proseslərdə inamlı şəkildə özünə, tutmuş olduğu yola güvənərək, nəhayət xalqın etimadına söykənərək prosesə qoşulmalı və qalib gəlməlidir.

- Başqa bir məsələyə də münasibətinizi öyrənmək istərdik. İstər müxalifət partiyaları, istərsə də iqtidaryönlü və mərkəzçi partiyalar olsun, bunların əksəriyyətində uzun illərdir eyni şəxs və şəxslər hakim mövqedədirlər. Necə hesab edirsiniz, bunlar nəticə etibarilə həmin partiyalarda avtoritarizmə, bir şəxsin və ya şəxslərin həmin siyasi qurumları  öz monopoliyasına almasına gətirib çıxarmırmı?

- Bununla bağlı yalnız onu demək istəyirəm ki, indiki zaman kəsiyində əgər bir partiya sədri olaraq öz potensialımı həmin təşkilatın inkişafına yönəldə, qoya bilirəmsə və mənim potensialım tükənməyibsə, belə demək mümkünsə, fiziki durumum, düşüncə tərzim, səhhətim bütün mənalarda partiyaya rəhbərlik etməyə imkan verirsə, o zaman bu prosesdən nə üçün kənarda qalım? İkincisi, hər bir məsələnin özünün vaxtı var, lazım gələndə AVP-nin sədri olaraq mən də istefaya gedəcəyəm və partiyanın qurultayı mənim yerimə kimisə müəyyənləşdirəcək, tapacaq, seçəcək, bununla  məndən sonra həmin şəxs partiyaya rəhbərlik edəcək. Üçüncüsü, bu məsələnin dəfələrlə mətbuatda gündəmə gətirilməsinə də, düşünürəm ki, elə bir ehtiyac yoxdur.

Elməddin MURADLI