Qabil Hüseynli: «Ermənistandan belə avantürist addımlar gözləmək olar»

Ölkədə Dağlıq Qarabağın müsəqilliyinin tanınması gündəliyə gətirilib

Ermənistan parlamenti qondarma Dağlıq Qarabağ Respublikasının tanınması məsələsini müzakirə edəcək. Ermənistan parlamentinin “İrs” fraksiyası spiker Ovik Abramyana “Dağlıq Qarabağ Respublikası”nın tanınması barədə qanun layihəsinə növbədənkənar baxılması ilə bağlı müraciət edib.
Qanun layihəsinin 1-ci maddəsində bildirilir ki, Ermənistan “Dağlıq Qarabağ Respublikası”nın müstəqilliyini tanıyır.
Ermənistan parlamentinin reqlamentinə görə, qanun layihəsi müzakirə edilmədən parlamentin müzakirəsinə çıxarılacaq və oktyabrın 5-də, saat 14.30-dan 16.30-dək deputatların müzakirəsinə veriləcək.
Əslində “İrs” fraksiyasının deputatları qanun layihəsini ötən il oktyabrın 15-də parlamentə təqdim etsələr də, layihənin parlamentin xarici əlaqələr daimi komissiyasında müzakirəsi və sessiyaya çıxarılması ləngiyirdi.
Dağlıq Qarabağın müstəqilliyinin tanınması məsələsi Ermənistan prezidenti Serj Sarqsyanın son bəyanatında da yer alıb. «Münaqişəsinin sülh yolu ilə nizamlanması yalnız bir halda mümkündür – bu da "Qarabağ"ın beynəlxalq səviyyədə tanınmasıdır»-deyən Sarqsyan Rusiya ilə bağlanan müqavilənin əslində Azərbaycanın hərb yolunu kəsməyə yönəldiyini gizlətməyib: «Problemin hərbi yolla həllinə gəldikdə isə, biz artıq bu yolu keçmişik və bu variantın nəticəsi göz qabağındadır».

Ekspertlər Dağlıq Qarabağın müstəqilliyinin tanınması  məsələsinin məhz Rusiya-Ermənistan müqaviləsinin bağlanmasından sonra gündəmə gətirilməsini təsadüfi saymır. Politoloq Qabil Hüseynli hesab edir ki, Rusiya bu addımı ilə son dövrlər çətin syiasi situasiyaya düşmüş Sarqsyan hakimiyyətinə ikinci nəfəs vermiş oldu: «Ermənistanın bundan sonra kəskin bəyanatlar verməsinin tez-tez şahidi olacağıq». Politoloq hesab edir ki, o cümlədən Ermənistan parlamenti sözügedən layihəni qəbul edə bilər: «Rusiya-Ermənistan cütlüyü bu istiqamətdə birinci addım kimi hərbi bazanın gücləndirilməsini rəsmiləşdirdi. İndi isə növbəti addım kimi Ermənistan Dağlıq Qarabağı tanıya bilər. Yəni Ermənistandan bu cür avantürist addımlar gözləmək olar». Bununla belə politoloq bu addımın beyənlxalq aləmdə birmənalı qarşılanmayacağını da bildirir: «İstənilən halda ermənilər bu məsələni gündəliyə gətiriblərsə, deməli hansısa planları var. Amma yəqin ki, onlar da dünya ictimaiyyətinin reaksiyasını yoxlayacaq, hadisələrin gedişindən asılı olaraq hərəkət edəcəklər».
Hüseyn