Bahar Muradova: “Hamı arzu edir ki, Qarabağ məsələsində Dağlıq Qarabağın azərbaycanlı İcması da kifayət qədər fəal olsun”

 “Azərbaycan Respublikasının Dağlıq Qarabağ bölgəsinin azərbaycanlı İcması” İctimai Birliyinin ünvanına bir müddət əvvəl səslənən fikirləri kimlərsə tənqid,  kimlərsə arzu kimi dəyərləndirə bilər. Özü də mən hesab etmirəm ki, hər hansı bir Azərbaycan vətəndaşı bu məsələdə başqa cür düşünə bilsin. Bunu əslən qarabağlı millət vəkili, Milli Məclis (MM) sədrinin müavini Bahar Muradova dilə gətirib. Onun  dediyinə görə, hamı arzu edir ki, Qarabağ  məsələsində Dağlıq Qarabağın azərbaycanlı İcması da kifayət qədər fəal olmalıdır və fəal olsun. “Fikirlər yalnız bundan qaynaqlanır. Çünki beynəlxalq təşkilatlarda, bu proseslərdə iştirak edən tərəflər kimi bilirik ki, məqam gələcək tərəflər, icmalar öz sözünü deməldir və bir növ bu icmalar bu prosesin içərisində fəaliyyət göstərərək söz deməyə hazır olmalıdırlar. Yəni, onlar bütün imkanlardan istifadə edərək öz sözlərini deməli və beynəlxalq ictimaiyyət bu səsi eşitməlidir”-deyə,o, bildirib. Vitse-spikerin bildirdiyinə görə, əslində Dağlıq Qarabağın erməni İcması danışıqlara, təmaslara ehtiyac duymur, o hesab edir ki, özü üçün bir rejim qurub və artıq istədiyinə nail olub: “Eyni zamanda, onlar düşünürlər ki, “dostlar”ının da borcu ondan ibarətdir ki, bu rejimin daimi olması üçün çalışsınlar. Ona görə də öz “həyatları” ilə məşğuldurlar. Amma biz öz ev-eşiyimizdən didərgin düşmüşük, biz necə susa,necə laqeyd, necə biganə qala bilərik? Bu fikirlər də  hər bir fərdin ayrı fikri olmalı deyil, o ümumi bir icmanın , kütlənin, Azərbaycan xalqının bir hissəsinin, bütövlükdə xalqımızın mövqeyi kimi səslənməlidir. Odur ki, Dağlıq Qarabağın azərbaycanlı İcması da kifayət qədər fəal olmalıdır”. B.Muradova bildirib ki, İcmanın da fəal olması üçün bir sıra amillər var: “Əvvəla,orada cəmləşən insanlar Azərbaycanı çox yaxşı tanıyan, xalqımızın çox yaxşı tanıdığı ziyalılardır , onlar ən müxtəlif sahələrdə uğur qazanmış insanlardır və elə bu prosesin özündə də kifayət qədər töhfə verə  biləcək şəxslərdir.İkincisi, İcmanın maddi təminatı olmalıdır. Bu günə qədər İcma mövcud imkanlar çərçivəsində fəaliyyət göstərir, Azərbaycan dövləti buna müəyyən qədər yardım edirdi. Amma bu məsələ Milli Məclisdə budcə müzakirələri zamanı mənim tərəfimdən qaldırıldı ki, İcma büdcədən ayrıca vəsait almalı və öz fəaliyyətini Azərbaycan dövlətinin ayırdığı vəsait hesabına yeniləşdirməli, genişləndirməlidir. Bildiyiniz kimi, bu ilin büdcəsində də bu məsələ nəzərə alındı və artıq İcmanın fəaliyyətində bir intensivlik müşahidə olunmaqdadır, o, fəaliyyətini genişləndirməkdədir. Bu gün dünyanın müxtəlif ölkələrində  İcmanın keçirdiyi konfranslar, görüşlər , tədbirlər onların fəallığının göstəricisi sayıla bilər. Bununla belə düşünürəm ki, İcmanın öz fəaliyyətini daha da artırmaq imkanları var, onlar bunu edəcəklər. Yəni,onlar Azərbaycan dövlətinin məqsədlərinə və maraqlarına uyğun şəkildə, ölkə prezidentinin yürütdüyü siyasətə kömək məqsədilə fəaliyyətlərini genişləndirəcəklər. Bir sözlə, İcma haqda səslənən fikirlərin yalnız ümumi işə xeyri var”.

Elməddin