Haiti milli futbol komandası formanı potensial olaraq siyasi cəhətdən təhlükəli hesab edən Beynəlxalq Futbol Assosiasiyaları Federasiyasının (FIFA) qadağası səbəbindən forma dizaynını dəyişdirmək məcburiyyətində qalıb.
Ucnoqta.az xəbər verir ki, bu barədə istehsalçı Saeta şirkətinin Reuters agentliyinə istinadən verdiyi açıqlamada bildirilib.
Komandanın forması əvvəlcə Haiti İnqilabı zamanı baş verən və keçmiş Fransa müstəmləkəsinin müstəqillik qazanması ilə nəticələnən döyüşün bir parçasını təsvir edirdi.
Saeta forma dizaynının Haiti xalqının qürurunu, dözümlülüyünü və ruhunu əks etdirdiyini və siyasi bəyanat kimi nəzərdə tutulmadığını bildirib.
"FIFA araşdırma zamanı bəzi vizual elementlərin fərqli şərhlərə məruz qaldığını və nəticədə dizayn dəyişikliklərini tələb etdiyini müəyyən edib. Bu şərh bizim niyyətlərimizdən fərqli olsa da, Saeta prosesə əməl etdi və FİFA-nın son tələblərinə cavab verdi", - deyə açıqlamada bildirilir.