Türkiyə şirkətləri SAHA 2026 Beynəlxalq Müdafiə, Aviasiya və Kosmik Sənaye Sərgisinin ilk üç günündə təxminən 8 milyard dollar dəyərində ixrac müqavilələri imzalayıblar.
Ucnoqta.az Türkiyə mətbuatına istinadən xəbər verir ki, Türkiyənin və Avropanın ən böyük müdafiə, aviasiya və kosmik sənaye klasteri olan SAHA İstanbul tərəfindən təşkil edilən SAHA 2026, İstanbul Sərgi Mərkəzində davam edir.
Türkiyə şirkətləri Anadolu Agentliyinin (AA) Qlobal Kommunikasiya Tərəfdaşı olduğu SAHA 2026-da ixrac yönümlü müqavilələr bağlayırlar.
SAHA İstanbul sədri Haluk Bayraktar sosial media paylaşımında bildirib: "Bir ölkə olaraq SAHA 2026-da tarixi bir rekorda imza atdıq. Sərginin ilk 3 günündə şirkətlərimiz təxminən 8 milyard dollarlıq ixrac müqavilələri imzaladılar. Bu qürurlu nailiyyəti qazanan bütün SAHA İstanbul üzvlərini ürəkdən təbrik edirəm".
SAHA 2026 sabah keçiriləcək tədbirlərdən sonra başa çatacaq.