Finlandiya Hərbi Hava Qüvvələri ilk uçuşunu Finlandiya pilotlarının təlim proqramının bir hissəsi olaraq Amerika F-35A Lightning II qırıcı təyyarəsi ilə həyata keçirib.
Ucnoqta.az bildirir ki, bu barədə Finlandiya Hərbi Hava Qüvvələrinin mətbuat xidməti məlumat verib.
Mətbuat xidmətinin məlumatına görə, uçuş 15 apreldə Arkanzasdakı Ebbing Hərbi Hava Qüvvələri bazasından həyata keçirilib. Burada fin pilotları ötən ilin sentyabr ayından bəri F-35 qırıcı təyyarələrində təlim keçiriblər. Təlim proqramında ümumilikdə 150 fin pilotu iştirak edir.
Ebbing Hərbi Hava Qüvvələri bazasında hazırda Finlandiya Hərbi Hava Qüvvələrinin təlimi üçün nəzərdə tutulmuş səkkiz qırıcı təyyarə yerləşir.
2022-ci ildə Finlandiya Amerika şirkəti Lockheed Martin ilə F-35A Lightning II çoxməqsədli qırıcı təyyarələrinin alınması barədə müqavilə imzalayıb. Ümumilikdə 64 təyyarə alınacaq.