Banqladeş hökuməti yanacaq və elektrik enerjisinə qənaət etmək üçün ölkə daxilində ofislərdə, ticarət mərkəzlərində və bazarlarda iş saatlarını azaltmaq qərarına gəlib.
Ucnoqta.az xəbər verir ki, bu barədə cümə axşamı keçirilən mətbuat konfransında Nazirlər Kabinetinin katibi Nəsimul Qani bildirib.
"The Business Standard" qəzeti katibin sözlərinə istinadən qeyd edir ki, növbəti iş günündən etibarən həm dövlət, həm də özəl sektorda iş saatları bir saat azaldılacaq. Banklar səhər saat 9:00-dan 15:00-dək açıq olacaq, ödənişlər saat 15:00-da başa çatacaq və ofislər əlaqəli xidmətlər üçün saat 16:00-a qədər açıq qalacaq.
Rəsmi şəxs əlavə edib ki, yanacaq və elektrik enerjisinə qənaət etmək üçün bütün bazarlar və ticarət mərkəzləri saat 18:00-da bağlanmalıdır.
O, yeni qaydaların baqqal mağazaları, apteklər və iaşə məntəqələri kimi vacib xidmətlər göstərən müəssisələrə təsir etməyəcəyini bildirib.
Hökumət həmçinin elektrik enerjisi və qaz istehsalı da daxil olmaqla enerji sektorunda xərclərin 30% azaldılmasını əmr edib.
Növbəti üç ay ərzində quru, dəniz və ya hava nəqliyyatı olsun, yeni ictimai nəqliyyat alınmayacaq. Kompüter avadanlıqlarının alınmasına da oxşar qadağa qoyulub. Dövlət qulluqçuları üçün xarici səfərlərin və təlim proqramlarının sayı yarıya endirilir, görüşlər və seminarlar üçün əyləncə xərcləri isə 50% azaldılır.
Tıxacları və yanacaq sərfiyyatını azaltmaq üçün Banqladeş hakimiyyəti məktəb daşınması üçün elektrik avtobuslarının rüsumsuz idxalına icazə verib, kommersiya sektoru üçün yeni elektrik avtobuslarının idxal rüsumu isə 20%-ə endirilib və köhnə avtobusların idxalı qadağandır.
Bu tədbirlərə həmçinin toylarda və digər özəl tədbirlərdə dekorativ işıqlandırmanın istifadəsinə qadağa da daxildir.