Amerika təyyarədaşıyan gəmisi "USS Gerald R. Ford" Yunanıstanın Krit adasındakı Souda Körfəzindəki ABŞ bazasına çatıb və 27 fevrala qədər orada qalacaq.
Ucnoqta.az bildirir ki, bu barədə "Proto Thema" qəzeti məlumat verib.
Qəzetin məlumatına görə, 4500 nəfərlik heyətə malik təyyarədaşıyan gəmi yanacaq doldurmaq üçün cümə gününə qədər Soudada qalacaq.
"Proto Thema" qeyd edib ki, gəminin gəlişi ABŞ-nin 6-cı Donanmasının Aralıq dənizində planlaşdırılan mövcudluğunun bir hissəsidir. Kritdəki bazada həmçinin F-35 və A-10 kimi bir çox Amerika hərbi təyyarəsi yerləşir.
USS Gerald R. Ford təyyarədaşıyan gəmisi ABŞ Hərbi Dəniz Qüvvələrində öz tipli ən böyük və ən texnoloji cəhətdən inkişaf etmiş gəmidir. O, 2009-cu ildə inşa edilib və 2013-cü ildə suya salınıb. O, 2017-ci ildə istismara verilib. Gəminin uzunluğu 337 metrdir və sürəti 30 uzeldən (saatda 56 km) çoxdur. Təyyarə gəmisi müxtəlif tipli 75-dən çox təyyarə daşıya bilir.