Halal olsun sənə Briliant, üzümüzü ağ elədin. Allah o "samovarını" sənə çox görməsin. Sayəndə bütün Türkiyə sənin "samovarından" danışır. Bilməyənlərə də agah olsun ki, bizim as sənətkarımız Briliant Dadaşova "Kanal D"də Seda Sayanın proqramına qatılıb və proqramda türk müğənnisinin "Türkiyəyə gələndə həyat yoldaşınızlamı gəlirsiniz" sualına Briliant "Bizdə bir məsəl var ki, hər yerə öz samovarınla getmə. Türkiyədə nə çoxdur samovar..." cavabını verib. Öncə sənətçinin diqqətinə çatdırım ki, bu, bizim məsəl deyil.
Yazıq Seda Sayan. Türk tamaşaçılarının qarşısında utanıb, qızarıb (baxmayaraq ki, 7 dəfə ərə gedib) və bizim müğənniyə başa salıb ki, bu sözü işlətmək ayıbdır. Xüsusilə də, qadın üçün. Demə, Türkiyədə bu məsəli yalnız kişilər çəkirmiş.
Hələ Briliant bizim sənətçilərin abırlılarındandır. Düşünün də, Rəqsanə olsaydı, nə deyəcəkdi. Hələ Nisə Qasımovanın verilişində Briliant bunu desəydi. Aləm olacaqdı. Yeri gəldi-gəlmədi, məntiqsiz-məntiqli fikirlərə əl çaldıran Nisə buna da, bağıraraq, studiyadakılara "alqışlayın" deyəcəkdi. Bilmirəm biz niyə türk kanallarını qınayırıq ki, qadınlarımızı təhqir edirlər. İndi, a millət, Briliantın bu biədəb zarafatındanmı deyim, ciddi fikrindənmi deyim, sonra o kanallar və o kanalların tamaşaçısı bizim haqqımızda nə düşünəcək?
Şəxsən mən bir də türk kanallarında qadınlarımız haqqında nəsə deyilsə, reaksiya verməyəcəm. Niyə də verim? Bir şeyə ki, biz şərait yaradırıq. Səsimi çıxarsam, Briliantın "samovarını" qoyacaqlar qarşıma ki, bu da etirazına cavab.
Hələ Briliant yaxşıdır e, yenə "samovardan" danışır. Bizim Tünzalə deputat olmaqdan dəm vurur. Bu qızcığaz bir-iki nazir xanımının, bir-iki də deputatın mahnısını oxuyur və özünü deputat kürsüsündə görür. Daha başa düşmür ki, Taimex-in dovğasını içməklə deputat olmaq olmur. Yüz faiz, Tünzalə Zeynəb xanım Xanlarova ilə bəhsə girib. Yəqin düşünür ki, növbəti il xanım deputatın yeri boşalacaq. Fürsəti niyə fovtə versin ki. Hələ harasıdır? Bir neçə aydan sonra Aygün Kazımova da deputatlıq iddiasına düşəcək. Qoyun, Həcər qeyrətli, Xuraman vəfalı Tünzalə parlamentə girsin, sonrası əla olacaq, sənətçilərin parlamentə axını başlayacaq.
Aygün demişkən, bu yaxınlarda bu sənətçiyə ev verilib. Aydın məsələdir ki, dövlət həmişə öz qayğısını sənətçilərə göstərib. Bu da onun üçündür ki, gedib onun-bunun əlini öpməsinlər. Öz evlərində yaşasınlar. Pis-yaxşı, dövlətin ayırdığı təqaüdlə dolana bilsinlər. Yəni bu dəfə də dövlətimiz əhdinə sadiq qalıb sənətçiyə ev verib. Aygün də etməyib tənbəllik, mətbuata deyib ki, yeni evindən qarderob kimi istifadə edəcək. Bu da bizim evsiz jurnalistləri cin atına mindirib. Bu sənətçi dərk etmir ki, o, pal-paltarını yığmağa yer tapmır, bizim jurnalistlər isə yatmağa. Yenə Aygünün "Hummer"i var. Lazım olsa, onun içində də gecələyə bilər. Bizim jurnalistlərin heç "zapı"sı da yoxdur.
Əlqərəz, əziz oxucular, tam rahat olun. Gələn il siz Tünzaləni parlamentin lap ön sıralarında beynəlxalq məsələlərdən danışarkən görəcəksiniz. Bu sətirləri yazarkən yanımda əyləşən həmkarım dəhşətə gəldi və "onda kül oldu bu millətin başına ki" dedi. Eşitdiyimə görə, bəziləri Tünzaləni əməlli-başlı inandırırlar ki, o, tam bir diplomat kimi danışır, çox savadlıdır və yeri parlamentdir. İndi, əziz oxucular, bu kəlmələr sizə deyilsə, siz deputat olmaq istəməzsiniz?

P.S. Briliantın menyüsünə: hamı yerli mal alsın, xeyir Vətənə qalsın!