Dünya iqtisadiyyatının bərpası və inkişafı ləng gedir. Artıq dollar və dollarla bağlı aktivlər investorlar üçün cəlbedici deyil. Daha doğrusu investorlar ondan xilas olmağa üstünlük verirlər. Bu günlərdə G7 ölkələrinin maliyyə nazirlərinin görüşünün nəticələri də dollar üçün perspektivli gələcək vəd etmir. «Güclü dollar» artıq arxada qalıb. Onun əleyhinə Federal Ehtiyat Sisteminin çap maşınları və ABŞ-da tələbatın azalması işləyir. Dolların möhkəmlənməsi üçün isə başlıca addım uçot dərəcəsinin qaldırılması siklinə qayıtmaqdır. Bunu isə Federal Ehtiyat Sistemi yaxın perspektdə edə bilməyəcək. Hələki ölkə iqtisadiyyatı möhkəm inkişaf relsinə düşməyib. Çünki uçot dərəcəsinin qaldırılması yenicə cücərən inkişaf tempini boğa bilər. Beynəlxalq Valyuta Fondunun son tövsiyələri də uçot dərəcəsinin qaldırılmasının çox təhlükəli olduğunu vurğulayıb. Fond rəsmiləri hesab edir ki, iqtisadiyyatın bərpası üçün mərkəzi bank aşağı uçot dərəcəsini saxlamalı stimullaşdırıcı tədbirləri davam etdirməlidir. Bundan başqa, ABŞhakimiyyəti böhran əleyhinə stimullaşdırıcı proqramını davam etdirir. Bu o deməkdir ki, çap maşını tam gücü ilə işləyəcək. Beləliklə, «güclü dollar» amerika iqtisadiyyatının dirçəlməsinə qurban verilir. Hakimiyyət başa düşür ki, dolların digər aparıcı valyutalara nisbətən dəyərsizləşməsinin qarşısını almaq üçün nəsə etmək gücündə deyil. Özü də bunda maraqlı deyil. Birincisi, dolların möhkəmlənməsinin arxasında güclü iqtisadiyyat dayanmalıdır ki, bu da  yuxarıda qeyd etdiyimiz kimi indiki böhran dövründə reallıqdan uzaqdır. İkincisi, ABŞ dolları zəiflətməklə iqtisadiyyatında canlanma yaratmaq istəyir. Çünki ucuz məhsul ölkəyə gətirilən xarici məhsullarla rəqabət aparmaq imkanı qazanır. İstehlakçı isə daha ucuz və keyfiyyətli məhsula üstünlük verir. Ucuz ABŞ məhsulları nəinki daxili bazarda, həm də xarici bazarda mövqeyini möhkəmləndirir. Bu, istehsalı artırmaqla yanaşı ixraca təkan verir, iqtisadiyatın artım tempini stimullaşdırır. Deməli, güclü dollar ABŞ-a sərfəli deyil. Bundan məyus olanlar isə investorlardvır. Onlar kapitallarının bir hissəsini daha etibarlı avropa aktivlərinə və qiymətli metallara yönəltmək məcburiyyətində qalıblar.
 Hadisələrin bu istiqamətdə inkişafı dolların dünya valyutası olması imkanlarına da təsir edir. Hazırda onun dünya valyutası olmasına qarşı mübarizə aparan kifayət qədər qüvvələr var. Xüsusilə yanacağın dollarla alqı-satqısına qarşı çıxanlar ondan imtina etməyə çalışırlar. İran körfəsi ölkələri, Çin, Rusiya, Yaponiya və Fransa birlikdə neftin alqı-satqısında dollardan imtina planı üzərində işləyirlər. Artıq həmin ölkələrin maliyyə nazirləri və mərkəzi banklarının rəhbərləri arasında bir neçə görüş keçirilib. Həmin görüşlərdə neftin qiymətinin Yaponiya iyenası, Çin yuanı, qızıl və Səudiyyə Ərəbistanı, Birləşmiş Ərəb Əmirlikləri, Küveyt  və Qətərin birlikdə istifadə edəcəyi valyutanın (onun yaradılması nəzərdə tutulur) da daxil olduğu valyuta səbətinə bağlanması müzakirə edilib. Neftin dollarla alqı-satqısından imtina edilməsi ilə bağlı xəbərləri İran körfəzi ölkələri və Çin maliyyə dairələrində təsdiq ediblər. Bu cür dəyişikliyə Braziliya və Hindistandan da dəstək gəlib. Yanacağın alqı-satqısında dollardan imtinanın 2018-ci ildən baş tutacağı planlaşdırılır. Hələlik valyuta səbətinin tərkibi tam yekunlaşmayıb. Ola bilsin ki, Rusiya rublu da valyuta səbətinə daxil olsun. Beləliklə, ABŞ zəif dollar hesabına iqtisadiyyatını dircəltmək istəyir, yanacaqla zəngin ölkələr isə onla alqı-satqıdan xilas olmağa çalışırlar. Fransa, Yaponiya və Çinin də onlara qoşulması dollar üçün xoş gələcək vəd etmir.