Protokollarla tanış olmaq üçün eynulla fətullayevə daha 10 gün vaxt verilib

Dünən Bakı Apelyasiya Məhkəməsində hakim Mirpaşa Hüseynovun sədrliyi ilə “Gündəlik Azərbaycan” və “Realnıy Azerbaydjan” qəzetlərinin sabiq baş redaktoru Eynulla Fətullayev apelyasiya şikayətinə baxılıb. Prosesin əvvəlində təqsirləndirilən Eynulla Fətullayev cinayət işi ilə bağlı Qaradağ Rayon Məhkəməsində keçirilən prosesin protokolları ilə tanış olmaq üçün məhkəmədən növbəti dəfə vaxt istəyib. Məhkəmə E.Fətullayevin bu istəyini nəzərə alıb.  Proses sentyabrın 17-dək təxirə salınıb. 
Qeyd edək ki, Qaradağ Rayon Məhkəməsinin hökmü ilə Cinayət Məcəlləsinin 234.1-ci maddəsi ilə (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) təqsirli bilinən Eynulla Fətullayev 2 il 6 ay müddətinə azadlıqdan məhrum edilib. E.Fətullayev 2007-ci ildən həbsdə və o, iki müxtəlif iş üzrə ümumən 8 il 6 ay müddətinə azadlıqdan məhrum etmə cəzası alıb. Avropa İnsan Hüquqları Məhkəməsi 2010-cu il aprelin 22-də Eynulla Fətullayevin həmin iki iş üzrə Azərbaycan dövlətinə qarşı şikayətinə baxaraq ədalətli mühakimə hüququnun pozulduğunu tanıyıb, onun dərhal azadlığa buraxılmasını tələb edib, jurnalistə 25 min avro təzminat ödənilməsi haqda qərar qəbul edib.

Xalid