Qurban Qurbanov Zauru Rəşadın əvəzləyicisi kimi görür

"Qarabağ" klubunun aparıcı üzvlərinin əksəriyyəti  müxtəlif yığmaların düşərgəsində olsa da, Ağdam təmsilçisi növbəti tura ciddi hazırlıq görür. Baş məşqçi Qurban Qurbanov qısa fasilədən istifadə edərək, "Bakı" ilə yoldaşlıq görüşündə gənc oyunçuları sınaqdan çıxarıb. Bu yoxlama-sınaq matçına əvəzedici heyətlə çıxan ağdamlılar "Bakı"nın əsas komandası  qarşısında boyun əyməyib. Əksinə yerli gənclərdən təşkil olunmuş "Qarabağ"ın ikinci heyəti paytaxt təmsilçisi ilə başabaş mübarizə apardı. Nəticədə 1:0 hesabda geridə olan bakılılar sonda Safronin qolu sayəsində məğlubiyyətdən qaça bilib. Bu qarşılaşmadan sonra "Qarabağ"ın baş məşqçisi mətbuat nümayəndəlrinin suallarını cavablandırıb.

- Hazırlıq barədə nə deyə bilərsiniz?

- Futbolçularımızın əksəriyyəti müxtəlif yığma komandalara yollanıb. Düşərgədə 11-12 futbolçu qalıb. Məşq prosesinə təsir etməmək üçün əvəzedici heyətdən bir neçə oyunçunu əsas komandaya cəlb etmişik. Onlar "Qarabağ"ın gələcəyidir. "Bakı" ilə oyunda da gənc oyunçular üzərinə düşən vəzifənin öhdəsindən gəlməyə çalışdılar. Mənə elə gəlir ki, onlar ilk sınaqdan yaxşı keçdilər. Belə stabil oynasalar qısa zaman ərzində onlar əsas komandada öz yerlərini tutacaqlar.

- Futbolçular Avropa Liqasının psixoloji gərginliyini və yorğunluğunu üzərindən ata biliblər?

- Hələki futbolçuların yorğunluğu bilinmir. Ancaq çempionat oyunlarına fərqli hazırlaşmaq lazımdır. Biz hazırlıq zamanı çempionat oyunlarını düşünməmişdik. Həmin vaxt diqqətimizi Avropa oyunlarına yönəltmişdik. Ona görə də başlanğıc bir qədər ağır oldu. MOİK-lə oyunda çətin qələbə qazandıq. Premyer Liqanın oyunları ildən-ilə gərgin keçir. Klub rəhbərliyi qarşımıza hansı məqsədi qoysa, ona nail olmağa çalışacağıq.

- Rəşad Sadıqov "Qarabağ"ın əsas heyət oyunçusu olmaqla yanaşı, həm də komandanın lideri idi. Yəqin ki, onun yeri görünəcək?

- Rəşadın getməsi müəyyən qədər bizə çətinlik yaradacaq. O, "Qarabağ"ın lideri idi. Eyni zamanda artıq heyət formalaşmaq üzrəydi. Hər oyunda 1-2 futbolçunu dəyişirdik. Müdafiəçinin komandadan getməsi arxa xəttdə çətinlik yarada bilər. O, oynamadığı vaxtlarda Zaur Həşimova şans vermişik. Zaur da hardasa etimadı doğruldub. Çalışacağıq ki, Rəşad Sadıqovun yoxluğu görünməsin.

- "Transfer pəncərəsi"nin sonuncu günündə Devran Ayhanı heyətinizə qatdınız. Türkiyəli futbolçunun keçidinin gec baş tutması nə ilə bağlı idi?

- Transferə çıxarıldığı gündən futbolçu ilə maraqlanırdıq. Rəşadın gedişi bu keçidi daha da sürətləndirdi. Ola bilsin ki, Rəşadın mövqeyinə Samir Abbasovu çəkdik. Belədə mərkəzdə boşluq yaranmasın deyə, Ayhanı komandamıza dəvət etdik. Həm də o, Premyer Liqada çıxış edib, çempionatımız və klublarımız haqqında məlumatlıdır. Onun mümkün transferi klubun büdcəsinə uyğun olduğuna görə Rəşadın gedişindən dərhal sonra bu transferi rəsmiləşdirdik.

- Deyəsən, Sadıqovun gedişi sizin üçün gözlənilməz oldu...

- Avrokuboklarda ona bir neçə klubdan təklif gəlmişdi. Rəşad sona qədər bizə kömək etdi. "Borussiya" səddini keçsəydik, Rəşad komandanı tərk etməyəcəkdi. "Əskişəhərspor"dan təklif alanda onlardan vaxt istədi. Türkiyə təmsilçisi sona qədər gözlədi və nəhayət, keçid baş tutdu.

- Avrokuboklardan fərqli olaraq "Qarabağ"ın Premyer Liqada yaxşı oyun göstərə bilməməsinə səbəb nədir?

- Bu halla ötən il üzləşdik. Yəni avrokuboklardan sonra çempionat oyunlarına kökləndik. Sonda mövsümü üçüncü pillədə başa vurduq. Çox çətinliklərlə üzləşdik. Mövsümün gedişində zədəli futbolçularımız oldu, Vaqif komandadan ayrıldı. Bəzən  Rəşad Sadıqov müdafiədə deyil, bir qədər irəlidə oynayırdı. Əsas problemimiz heyətlə bağlı idi. Ehtiyyat qüvvə olmadan iki cəbhədə mübarizə aparmaq elə də asan deyil.

- Ötən il mübarizəni pley-off mərhələsində dayandırmağınızda ehtiyat oyunçuların az olmasının da təsiri oldu. "Transfer pəncərəsi" vaxtı yenə ən az transfer edən klub "Qarabağ" oldu. Ehtiyac yoxdur, yoxsa klubun büdcəsi çox transfer etməyə imkan vermir?

- Çalışırıq ki, heyətimizi qoruyub saxlayaq. Digər tərəfdən, az transfer etməyimizdə büdcəmizin də rolu var.

- Ötən il ev oyunlarını Quzanlıda keçirirdiniz. Həmin vaxt ev oyunları zamanı komandanı daha çox azarkeş dəstəkləyirdi. Ancaq bu dəfə rəqiblərinizi paytaxtda qəbul edəcəksiniz. Boş tribunalar qarşısında oynamaq çətin olmayacaq?

- Quzanlıda bizi 2500-ə yaxın azarkeş dəstəkləyirdi. Stadion həmişə dolu olurdu. Onların dəstəyi böyük idi. İndi boş tribunalar qarşısında oynayacağıq. Ancaq öyrəşmişik. Orada meydança ilə bağlı problem yarandığından, Bakıya dönməli olduq. Azarkeş amilinin az da olsa, təsiri olacaq.

- 21 yaşadək futbolçulardan ibarət yığmamızın albaniyalı həmyaşıdlarını məğlub etdiyi oyunu izlədiniz. Komanda necə təsir bağışlayırdı?

- Uşaqlar həvəsli idilər. Hiss olunurdu ki, xeyli vaxtdır qələbə qazanmırdılar. Hər şey qaydasında oldu. Qələbəni sona qədər qoruya bildilər.

- Yeri gəlmişkən, Elvin Məmmədovun son vaxtlar "Qarabağ"ın əsas heyətində oynamaması nə ilə bağlıdır?

- Bu adi haldır. Bununla bağlı aramızda mübahisə olmayıb, ola da bilməz. Çalışırıq hər bir futbolçuya şans verək və onun potensialından maksimum yararlanaq. Elvin komandaya yeni gələndə əsas heyətdə yer alırdı. İndi isə bir qədər geriləyib. Yzərində çalışır. Fərdi şəkildə məşqlər edir. Elvin "11-lik"də yer almırsa, bu, o demək deyil ki, layiq deyil. Olur ki, hər hansı futbolçu onun mövqeyində daha keyfiyyətli oynayır. Elvin bir qədər də artırmalıdır.